РАМАЗОН МУБОРАК!!

 

    Бизларни мўмин-мусулмон қилиб, ақл-заковатли  мавжудот этиб яратган Аллоҳ таолога ҳамдлар собит бўлсин!

   Бизлар учун Рамазони шариф рўзасини тутиш тартиби фарз, вожиб, мустаҳаб амалларни баён қилган Расули Акрам соллаллоҳу алайҳи васалламга беҳисоб салоту саломлар бўлсин!

    Борлиқ оламга раҳмат, мағфират, дўзахдан озод этгувчи бўлган муборак Рамазон ойининг ҳулули қутлуғ бўлсин!

  Инсоният аҳлига дунё ва охиратда саодат хазинасини тўкиб солган ибодатларнинг султони жаннат эшиги бўлмиш Райён эшигининг очқичи, унинг мезбони – шаҳри Рамазон барча-барчаларимизга муборак бўлсин!

   Рамазони шариф ҳилолининг барқ уриши Аллоҳ ва унинг малоикаларининг раҳмат салавотлари ёғилиши, унинг остида ер-осмоннинг  мунаввар, муаттар бўлиши, бутун мавжудотга бахт-саодат, шараф, файз-баракот, имон-эътиқод, тинчлик-осойишталик олиб келсин!

  Юртимизда эсаётган Рамазон шукуҳи тараннум этар экан, бизлар бахту-иқбол, озод ва фаровонлик неъмати узра келажак равнақи билан сарафроз айласин!

  Бугунги бизлар нима орзу қилсак, умид этсак, Яратганга дуо билан юзлансак, мақсад-матлабимиз ҳосил бўладиган, фараҳбахш, сурурбахш дамларда бир-биримизни муборакбод этиб, сурурларга эга бўлишимизни насиб қилсин!

   Зеро, Рамазон ойи имон ойи,

   Рамазон ойи ибодат ойи,

   Рамазон ойи саҳоват ойи.

  Рамазон ойи бизларни ҳамма-ҳаммамиз иттифоқ яшаб, эзгулик қилиш ва охиратда ажр-мукофотга эга бўлишга сабаб бўлувчи муборак ой.

  Рамазон ойи меҳр-мурувват раҳм-шафқат ойи.

  Рамазон ойи Аллоҳ таолонинг бизларга раҳмати ёғиб турадиган ой.

  Рамазон ойи бизларга Қуръон олиб келувчи Қуръон ойидир. Қуръон ўқиб роҳатланадиган ойдир.

 Иншоаллоҳ рўза тутсак имонимиз бақувват бўлади. Имонимизнинг нури зиёда бўлади. Бу ойда бажарадиган фарз, нофила ибодатларимиз, айтаётган таҳлил-тасбеҳларимиз учун катта раҳматга, файз-баракага зиёдаси билан сазовор бўладиган ойдир.

  Аллоҳ таборак ва таоло Рамазон ойини мукаммал, хатосиз ҳолатда адо этишимизни барчамизга насиб айласин. Халқимизни, юртимизни турли балою-офатлардан, турли касалликлардан, жумладан, вабо каби офатлардан Ўзи асрасин! Беморларга комил шифо берсин!

 Яна бир бор Рамазон барча-барчаларимизга муборак бўлсин!

Абдулҳай ТУРСУНОВ,
Ўзбекистон мусулмонлари идорасининг
Наманган вилоят вакили