Аллоҳ таоло инсонларни яхшилик, тинчлик ва осойишталик йўлида бир бўлишга буюрар экан, албатта, бу кўрсатмага амал қилиб яшаган бандаларни доимо тинчлик ва осойишталик билан сийлаган.

  Тинчлик халқларнинг энг эзгу орзуйи, Яратгандан сўраган энг керакли тилагидир. Лекин бир нарсани унутмаслик керак: кўриб турубмиз, дунёнинг ҳамма ерига ҳам бу улуғ неъмат бирдай насиб этмаган. Демак, бу неъматнинг шукрини қилишимиз, қадрига етишимиз зарур. Шу билан бирга, атрофимизда “Инсон ҳуқуқларини ҳимоя қилиш”, Виждон эркинлигини таъминлаш”, “оммавий маданият” каби четдан чиройли кўринган сўзлар билан халқимиз, ёшларимиз онгига тескари таъсир ўтказишга уринаётган кучлар ҳам бор. Улар бизларни миллий қадрятларимиздан узилиб, ўзларининг бузиқ ўзанларига солиб олмоқчи бўлаётганларини бир зум эсдан чиқармаслигимиз керак.

  Бугун замон воқеликка очиқ кўз ва теран мушоҳада билан қарашни, жаҳонда ва ён атрофимизда кузатилаётган маънавий тахдид-хатарларни тўғри баҳолаб, улардан тегишли сабоқлар чиқариб яшашни талаб этмоқда.

  Пайғамбаримиз (алайҳиссалом)”Икки неъмат бор, у ҳақда кишиларнинг кўпи зиён топиб, бебаҳра қолишади: сиҳат-саломатлик ва бўш вақт”, деб марҳамат қилганлар.

  Халқимиз “бир кун жанжал бўлган жойдан қирқ кун барака қочади”, дейди. Албатта, бу сўзларнинг исботини тартибсизликлар рўй бераётган давлатлар мисолида кўриб турибмиз. Уруш, жанжал, низолар одамлар тинчлигини бузиш билан бирга мамлакат иқтисодиётини ўн йиллаб орқага кетишига сабаб бўлади. Уриш бор жойда тараққиёт, ривожланиш тўхтайди.

  Динимиз бир-биримиз билан учрашганда олдин салом беришга тарғиб қилади. “Ассалому алайкум” - тинчлик ва яхшилик тилаш ифодасидир. Яъни, ҳар бир мўмин-мусулмон бир-бири билан учрашганда қалбга меҳр-муҳаббат солувчи,тинчлик-омонлик тилаги бўлган шу сўзларни айтиб саломлашади. Қаерда бўлмасин дуо қилса, олдин, юртимиз тинч бўлсин, дейди. Демак, халқимизнинг тили ва дилидаги эзгу тилаги бўлган тинчлик ва осойишталикни асраб-авайлаш, ҳимоя қилиш фақат муайан соҳалар ходимларининг вазифаси эмас, бу йўлда барчамиз, бутун халқимиз янада жипс бўлиб, ҳамжиҳатликда ҳаракат қилсак, яхши натижаларга эришамиз, иншааллоҳ.

Абдусаломхон Тожиходжаев,
Чуст тумани "Имомқулбой” жоме
 масжиди имом-хатиби