Тарихдан маълумки, барча буюк давлатларда ёшлар тарбиясига алоҳида эътибор қаратилган. Зеро, айнан жисмонан соғлом ва ақлли, салоҳиятли ёшлар ўз юртининг қудрати ва равнақига замин яратади ҳамда ўз ҳиссасини қўшади.

Ёшлар тарбияси, уларнинг илмли, ҳар томонлама етук бўлиб етишишида аввало оиланинг, маҳалланинг ўрни беқиёс. Шундай экан, ота-она ўз фарзандининг ёшлик чоғини сермазмун, намунали, фойдали ишлар билан ва савобли амаллар билан ўтказишига ёрдамчи бўлмоғи керак. Бу ҳақда Аллоҳ таоло Қуръони Каримда шундай марҳамат қилади: “Эй имон келтирганлар! Ўзларингизни ва оила аъзоларингизни ёқилғиси одамлар ва тошлар бўлмиш дўзахдан сақланг” (Таҳрим сураси 6-оят)

Ислом динида болаларни ҳали гўдаклик чоғиданоқ одоб-аҳлоққа ўргатиш тавсия қилинади. Оилада фарзандга катталарни ҳурмат қилиш, овқатланиш одоби, меҳмон кутиш одоби, кўчада ва кўпчилик орасида юриш-туриши, маданиятли бўлиши ўргатиб борилади. Бу борада бизнинг мусулмон халқимиз доимо муқаддас китобларга, катталарнинг ўгитига суянади. Ушбу масалага бармоқ орасидан қарайдиган инсонлар ҳам кўп учрайди. Улар учун фарзанд тарбияси ўзларининг ҳою-ҳавасларидан устун эмас, уларга фарзанд тарбияси иккинчи даражали. Айнан шундай оилаларда вояга етаётган фарзандлар ота-оналарининг масъулиятсизлиги сабабли йўлдан адашадилар, жиноятларга қўл урадилар.

Бугунги ривожланган даврда юртимизда фарзандларимиз учун етарлича шароитлар яратиб берилган. Дарсликлар, бадиий адабиётлар, телевизион дарслар, компьютерлар, турли хил тўгараклар, ўқув қуроллари ва ҳоказо. Буларнинг барчаси фарзандларимизнинг келажакда юрт учун, ўз халқи учун, ўз оиласи учун меҳнат қиладиган, юртимиз байроғини спорт, фан, адабиёт ва бошқа соҳаларда юксакларга кўтарадиган фарзандлар бўлиб етишиши учундир.

Динимизда ёшларни асосан ростгўйлик, ваъдага вафо, омонатдорлик, каттага хурмат, кичикка иззат, ўзгаларга меҳр-оқибатли бўлиш каби фазилатлар соҳиби қилиб вояга етказишга ката аҳамият қаратилган. Бунинг учун ота-онанинг ўзи ҳам юқоридаги амалларга қатъий риоя этишлари, имон-эътиқодли бўлишлари лозимдир. Илмли ёшларни юрт келажаги учун тарбиялаш сиз ва бизнинг зиммамизда. Улар ҳам сиз-у биз каби ўз фарзандларига эътиборли бўлсинлар.

Хурматали Нортиллаев,
Чуст туман "Эшон суфи бобо" жоме
масжиди имом хатиби