Аллоҳ таоло муборак Рамазон ойида ожизона бажарган ибодатларимизни қабул қилсин.  Ўзининг ибодатига тавфиқ бергани учун Аллоҳга хамду санолар бўлсин.

Бугун Ислом динимиздаги катта байрамлардан бири -Ийдул-фитр куни. Бу вақт бениҳоя хурсандчилик, яратган раббимизнинг фазли ва мархамати билан бандаларнинг  гунохлари кечириладиган улуғ фурсатдир.

Мана шундай хурсандччилик кунларга эсон-омон, хотиржамликда етиб келганимиз учун Аллоҳ таолога шукроналар айтамиз. Зеро яратган шукр қилгувчи бандаларига неъматларини зиёда қилиб беради, ношукрчиликнинг эса охири жуда ёмондир. Бу хақда Қуръони карим (Иброҳим сураси 7-оят)да шундай дейилган: “Яна роббингиз эълон қилган (бу сўзлар)ни эсланггиз: “Қасамки, агар (берган неъматларимга) шукр қилсангиз, албатта, (уларни янада) зиёда қилурман. Борди-ю, ношукрчилик қилсангиз, албатта, азобим (ҳам) жуда қаттиқдир”.. Ушбу ояти каримада шукр қилишлик ва ношукрчилик оқибатлари айтилган бўлиб, унинг хукмиқиёматга қадар барча инсониятга тегишлидир.

Шукр қилишлик ўз-ўзидан бўлмайди, балки ўзидаги моддий ва маънавий неъматлар хақида кўп мулохаза қилиш,  бирор неъматга эга бўлган тақдирда қандай холатда бўлиш кишини ўзидан кўра мухтожроқ, қийналганроқ кишиларни ёдга келтириши инсонни берилган неъмат учун Аллоҳ таолога шукр қилишга ундайди. Натижада ана шу неъматларни янада зиёда бўлишига сабаб бўлади. Ва аксинча, ношукрлик, нонкўрлик каби холатлар Аллоҳ таолонинг ғазабига олиб келади. Бунинг оқибатида берилган неъматларни қайтариб олиниши ёки офат, бало ва мусибатларга дуччор қилиш йўли билан жазоланиши мумкин бўлиб қолади.

Инсондаги шукроналик қаноат ва сабр каби сифатлар билан камолга етади. Чунки одам хар қанча неъматлар ва ютуқларга эришмасин, қаноатли бўлмас экан, ношукрликдан қутула олмайди. Сабр тоқатли бўла олмас экан, яхши кунларга ета олмайди.

Аллоҳ таоло ўзининг каломи (Юсуф сураси 90-оят)да шундай мархамат қилади: “... Дархақиқат, кимки Аллоҳдан қўрқиб, сабр қилса, албатта, Аллоҳ эзгу иш қилувчиларнинг мукофотини зое қилмаган”.

Пайғамбаримиз қаноат хақида шундай деганлар: “Мусулмон бўлган, етарли ризқ билан насибаланган ва Аллоҳ унга қаноат берган киши нажот топибди” (Имом Муслим ривояти)

Аллоҳ таоло ўз фазли билан бой қилган кишилар молларидан мухтож ва фақир, бева хамда беморларга закот, хайр эхсон қилишлари жамиятда инсонларни ўзаро илиқ муносабатда бўлишларига сабаб бўлади. Ислом дини нақадар инсонпарвар дин. Бу динимизда инсонларни ўзаро меҳр-мурувватли бўлишга тарғиб қилибгина қолмай, закот берувчини молини поклаб, уни янада кўпайишига замин тайёрлайди.

Шу сабабдан бу улуғ кунларни ғанимат билиб, савоб ва фазилатларидан умидвор бўлган холда оиламиз, яқинларимиз, қўни-қўшни ва қариндошларимиз холларидан хабар олишимиз даркор бўлади. Зеро яхшиликнинг ажри-фақат яхшиликдир.

Ҳайит бу-хурсандчилик, яхши кайфият ва эзгу, савобли ишлардан иборатдир.

 Ҳайит намозини адо этгандан сўнг, биринчиўринда бизларни дунёга келишимизга сабабчи бўлган меҳрибон ота-оналаримиз, қариндош уруғларимиз хамда ёру-биродарларимизни зиёрат қиламиз. Улардан хол-ахвол сўраш ва кўнгилларига хурсандчилик киритишга харакат қилишимиз зарур амаллардан хисобланади. Айрим сабаблар билан аразлашган гина кудратли кишилар ҳам бир-бирларини кечирсинлар. Шунда барчамиз яратганнинг рахматига сазовор бўламиз.

         Камолиддин Хамрақулов,
Норин туман бош имоми,
“Хақулобод” масжиди имом хатиби